1Cor 1 | ZomZIV | STEP | Pasian deihna hanga Christ Jesu sawltakpi khat dinga kisam Paul le i sanggampa Sosthenes in,

1 Corinthians 1

1 Pasian deihna hanga Christ Jesu sawltakpi khat dinga kisam Paul le i sanggampa Sosthenes in, ^a

2 Corinth a om Christ Jesu sunga sianthosaksa Pasian pawlpite le a siangtho dinga sapte, koimah peuh a om amaute le eite Topa - Topa Jesu Christ min a lote khempeuh tungah:

3 I Pa Pasian le Topa Jesu Christ tung pana hehpihna le lemna note tungah om ta hen. ^b

Lungdamkohna

4 Christ Jesu sungah note hong piak hehpihna hangin note adingin Pasian tungah lungdam ka ko tawntung hi. 5 Ahang in, ama sungah note na thugenna uh le na theihna khempeuh uh lam citengah hong kihausak zo hi; 6 bang hang hiam cih leh Christ thu teci ka panna uh note sungah kikipsak zo hi. 7 Tua ahi ciangin eite Topa Jesu Christ hong kilaak ding lawptaka na ngak kawmun khalam letsong kisap na nei kei uh hi. 8 I Topa Jesu Christ ni ciangin kawk na baan loh nadingun amah in a tawp dongin hong thakhauhsak ding hi. 9 A Tapa i Topa Jesu Christ tawh kipawlna sunga note hong sampa Pasian a muanhuai hi. ^c

Pawlpi Sunga Kipawlkhenna

10 Sangamte aw, note khempeuh khat le khat kithutuakin note lakah kipawl khenna a om loh nading le lungsim le ngaihsutna-a kicingtaka na kigawm theih nadingun i Topa Jesu Christ minin kong thum hi. 11 Ka sanggamte aw, Chloe innkuanpihte pawlkhat in note lakah kitotna om ci-in hong zasak zo uh hi. 12 Ka cihnopna hih ahi hi. Note khat in,”Ken Paul ka zui hi,” adang khat in,”Ken Apolos ka zui hi,” adang khat leuleu in, Ken Cephas ^{▼▼1.12 Tua pen, Peter} ka zui hi,” adang khat lai in, “Ken Christ ka zui hi,” na ci ciat uh hi. ^e

13 Christ kisehkhen ahi hiam? No adingin Paul kikilhlum ahi hiam? Paul min sungah ^{▼▼1.13 Ahikeh in; tg. 15 ah zong} note kibaptise na hi uh hiam? 14 Crispus le Gaius longal note kong baptize khak loh ka nuam mahmah hi. 15 Tua ahi ciangin kuamah in kei min sungah na kibaptise uh, ci-in a ci thei kei hi. 16 (Himah hi, Stephanas-te innkuan zong ka baptise lai hi. Tua lo adang ka baptise lam ka phawk kei hi.) 17 Ahang in, Christ in baptize dingin hong sawl lo a, lungdamna-thu hilh dingin hong sawl hi. Tua pen mihing pilna kammalte tawh gen ding hilo hi. Hi hileh Christ singlamteh vangliatna a hawmsuaksak kha ding hi.

Christ Pasian Pilna le Vangliatna

18 Ahang in, a mangthang mite adingin singlamteh thupuak, haina ahi hi. Ahi hangin hong kihonkhia eite adingin Pasian vangliatna ahi hi. 19 Ahang in,

“A pilte pilna ka susia ding hi;
a tei mite teina ka hawmsuaksak ding hi,” ^{▼▼1.19 Isa. 29:14} ci-in kigelh zo hi.

20 Mipil koi-ah om hiam? Lai siam koi-ah om hiam? Hih khanghun ah thuguizuih mi koi-ah om hiam? Pasian in leitung pilna, haina suaksak hi lo ahi hiam? 21 Ahang in, Pasian pilna sungah leitung in ama pilna tungtawnin amah thei lo ahi nungsang a kihilh haihuaina tungtawnin a um mite a hotkhiat ding Pasian lungkimna ahi hi. 22 Jew-te in lim lamdang ngen uh a, Greek-te in pilna a zong uh hi. 23 Ahi hangin kote in Jew-te adingin kisuih khakna suang, Gentile-te adingin haina ahi, a kikilhlum Christ thu ka hilh uh hi. 24 Ahi hangin Pasian sap Jew-te le Greek-te tungah Christ, Pasian vangliatna le Pasian pilna ahi hi. 25 Ahang in, Pasian haina in mihing pilna sangin pilzaw a, Pasian thanemna in mihing hatna sangin thakhauhzaw hi. ^h

26 Sanggamte aw, note hong kisap lai-in, bang na hi uh hiam, ngaihsun un. Hong sap mite lakah mihing tehnate-a apil na tam kei uh hi; mihing a thuzawh zong na tam kei uh hi; pianpih nampi zong tampi na om kei uh hi. 27 Ahi hangin Pasian in a pilte a maizumsak nadingin leitunga a hai nate a teel hi; Pasian in a thahatte a maizumsak nadingin leitunga a thanemte a teel hi; 28 Amah in a om nate a guak suaksak nadingin hih leitung na niamte, a simmawhhuai nate le a om lo nate a teel hi. 29 Tua pen ama mai-ah kuamah a kisaktheih loh nading ahi hi. 30 Ama hangin eite adinga Pasian tung pana pilna a hong suakpa Christ Jesu sungah note na om uh a, tua in eite thumaanna, sianthona le tatkhiatna ahi hi. 31 Tua ahi manin “A kisial peuhmah Topa sungah kisial ta hen,” ^{▼▼1.31 Jer. 9:24} ci-in kigelh hi. ^j